بوفيه مفتوح شهر رمضان
حكت لخطيبها بدي اروح على بوفيه مفتوح برمضان...
بلع ريقه،بس انتي عارفة حبيبتي انه راتبي يا دوب يكفي ،و كمان كم شهر رح نتزوج...
-ما دخلني دبر حالك،سكرت التلفون و نامت...
تزكر كم ضايل من الراتب، حسب و كتب و توتر، الدنيا جاي على عيد، اكيد بدها عيدية، اكيد بدها هدية و شوية لبس على مكياجات...
--
دخل معها عالمطعم و لونه متغير، هو مش بخيل بس ظروفه ما بتسمح و هي ما بترحم...
غابت الشمس...
اكلت و تصورت سيلفي، و كل الدنيا عرفت انها افطرت بمكان فخم مع خطيبها(تشعر بالسعادة)...
غص بكل لقمة و حاول يبتسم حتى يفرحها، تحمل انتقاداتها و لومها ليش عرسهم تأخر و إمها بلشت تتململ و بتقول عنه بماطل، مر بمخيلته منظره و هو بيسرق من غرفة أمه حق الفطور...
كتم دمعته، تركها بنص كلامها و سحب من ايدها الخاتم و الإسوارة اللي عمرها ما عجبتها، انصدمت...غرورها انطفى قدام الناس ،
حاسب، الفاتورة وصلت للقمر...
وقف عند اقرب محل مجوهرات، باع الخاتم و الإسوارة،
رجع للبيت و نزل عند رجل إمه، سامحيني يمّا...كنتي من الأول عارفة و ياما نصحتيني،
مد ايده و حق الدهب جوا كفه،
شدت امه على ايده، خليهم، بكرا بتجيب للي بتستاهل.
